मनसेचे अंकुश पवार आणि राष्ट्रवादीचे रंजन ठाकरे यांची माघार
नाशिक : आज अर्ज माघारीच्या वेळी महाविकास आघाडीच्या समोरील अडथळे दूर झाल्याचे दिसत असतानाच महायुती देखील दिलासा मिळाल्याचे चित्र आहे. मध्य नाशिक मतदारसंघात महायुतीतील घटक पक्ष असलेल्या अजित पवार गटाच्या राष्ट्रवादीचे शहराध्यक्ष रंजन ठाकरे यांनी बंडखोरी केल्याने अनेकांच्या भुवया उंचावल्या होत्या यादरम्यान रंजन ठाकरे यांनी उमेदवारीसाठी कॉग्रेस-राष्ट्रवादीच्या नेत्यांच्या देखील भेटीगाठी घेतल्याचे वृत्त होते त्यानंतर भाजपच्या वतीने विद्यमान आमदार देवयानी फरांदे यांची उमेदवारी जाहीर करण्यात आली होती मात्र मित्र पक्षाच्या शहराध्यक्ष यांनीच बंडखोरी केल्याने भाजपची डोकेदुखी वाढली होती मात्र आज रंजन ठाकरे यांनी आपला उमेदवारी अर्ज मागे घेतल्याने देवयानी फरांदे यांना दिलासा मिळाला आहे.महायुतीमधील मतविभाजन टाळण्यासाठी वरिष्ठांच्या सुचनेनंतर रंजन ठाकरे यांच्या माघार घेण्याचा निर्णय घेतला आहे. तर महाराष्ट्र नवनिर्माण सेनेच्या मध्य नाशिक मधील उमेदवार अंकुश पवार यांच्या उमेदवारीमुळे देखील भाजपला मतविभागणीची भीती वाटत होती .त्यामुळे मुंबईत इतर ठिकाणी भाजप मनसेला पाठींबा देईल या अटीवर व मनसे अध्यक्ष राज ठाकरे यांच्या आदेशानुसार मनसेच्या मध्य नाशिक मतदारसंघातील उमेदवार अंकुश पवार यांनी आज माघार घेतली. दोन उमेदवारांच्या अर्ज माघारीमुळे भाजपच्या उमेदवार देवयानी फरांदे यांना दिलासा मिळाल्याचे चित्र आहे.
