बंगालच्या गंगा नदीत 19 किलोमीटर अंतर दोन तास वीस मिनिटांत पार
नाशिकरोडच्या योगेश्वरी प्रशांत जेजुरकर हिने जलतरण स्पर्धेत राष्ट्रीय स्तरावर यश प्राप्त केल्याने संपूर्ण नाशिक शहरातून योगेश्वरी जेजुरकर हिच्यावर कौतुकाचा वर्षाव होत आहे.
मुर्शिदाबाद स्विमिंग असोसिएशन, सह आयोजक बंगाल आमेटूर स्विमिंग असोसिएशन, तसेच स्विमिंग फेडरेशन ऑफ इंडियाच्या वतीने मुर्शिदाबाद याठिकाणी ७८ व्या इंटरनॅशनल ओपन वॉटर स्विमिंग कॉम्पिटिशन स्पर्धा २०२४ चे आयोजन करण्यात आले होते.
या स्पर्धेत ३६ स्पर्धक सहभागी झाले होते. त्यात मुले आणि मुलींचाही सहभाग होता.
याच स्पर्धेत नाशिकमधून बारा स्पर्धकांनी सहभाग घेतला होता.
त्यात पत्रकार प्रशांत जेजुरकर यांची कन्या योगेश्वरी आणि प्रणव चीखले यांनीही सहभाग नोंदविला होता.
अगदी प्रतिकूल परिस्थितीवर मात करत, शालेय शिक्षण घेत असलेल्या योगेश्वरी हिने अनेक जलतरण स्पर्धेत सहभागी होत नेत्रदिपक यश मिळवत सर्वांनाच चकित केले आहे. याबरोबरच तिला वडील प्रशांत जेजुरकर यांनीही मेहनत घेत आपल्या मुलीला या स्पर्धेमध्ये यशस्वी मार्गदर्शन केले. त्याचबरोबर नाशिकरोडच्या जिजामाता जलतरण तलावाचे प्रशिक्षकांचेही मोठे योगदान यामध्ये राहिले आहे.
आतापर्यंत मिळालेला अनुभव पणास लावत योगेश्वरीने बंगालच्या गंगा नदीत १९ किलोमिटर अंतर दोन तास वीस मिनिटामध्ये यशस्वीरीत्या पार केले. यावेळी तिच्यासह नाशिकचा प्रणव चिखले हाही होता.
या स्पर्धेचा समारोप खासदार आणि प्रसिद्ध क्रिकेटपटू युसुफ ए, नियमत शेख, कोलकात्याचे परिवहन मंत्री स्नेह आशिष चक्रवर्ती, देवबुध्द दास, माधुरी घोष, यांच्या हस्ते योगेश्वरी आणि प्रणव चिखले यांना पारितोषिक देऊन गौरविण्यात आले
जलतरण तलावाच्या व्यवस्थापिका माया जगताप, विकास भडांगे, शंकर मादगुडी, हरी सोनकांबळे, अनिल जगताप, प्रभाकर रेवडे यांचे या खेळाडूंना मार्गदर्शन लाभले.
तसेच साधना एज्युकेशन स्कूल व ज्युनिअर कॉलेजचे योगेश गाडेकर,केजे मेहता हायस्कूल, महाविद्यालयाचे प्रविण जोशी यांचेही योगेश्वरीला मार्गदर्शन लाभले.
नाशिक जिल्हयातील खेळाडू विविध खेळांमध्ये नावलौकिक मिळवीत असताना पत्रकार, दिशा न्युज चॅनलचे प्रतिनिधी प्रशांत जेजुरकर यांच्या कन्येने जलतरण क्षेत्रात जे प्रावीण्य मिळविले त्याबद्दल क्रीडा क्षेत्रातून तिच्यावर अभिनंदनाचा वर्षाव होत आहे.देशाचे नाव उज्ज्वल करणाऱ्या खेळाडूंना शासनाने मदत केली पाहिजे त्याचबरोबर समाजातील इतर घटकांनी देखील पुढे येत या नवीन खेळाडूंना प्रोत्साहन दिले पाहिजे असे मत खेळाडू क्षेत्रातील मान्यवर उपस्थित करत असून आपल्या देशात फक्त क्रिकेट या खेळाकडे पाहिले जात असल्याने इतर क्षेत्रातील खेळाडूंना न्याय मिळत नसल्याची भावना काही खेळाडूंनी व्यक्त केली आहे.
