पालकमंत्री पदाचे बॅनर्स भुजबळांनी उतरवले
नाशिक : नाशिकमध्ये रस्त्यांच्या दुरावस्थेमुळे आणि खड्ड्यांमुळे आतापर्यंत 5 निष्पाप नागरिकांचे बळी गेलेले असताना यावर मोठ्या प्रमाणात राजकारण सुरू झाल्याने नागरिकांमध्ये संताप व्यक्त करण्यात येत आहे . मुख्य म्हणजे या घटनेला अजून देखील कोणालाही जबाबदार ठरविण्यात आले नसताना आता पालकमंत्री पदाचा मुद्दा पुढे आल्याने राजकारण तापले असून महायुतीमधील मित्र पक्षांमधील वाद रस्त्यावर आल्याचे चित्र आहे. शिंदे गटाच्या शिवसेनेच्या आंदोलनानंतर आता राष्ट्रवादी युवक काँग्रेसतर्फे शहरात ठिकठिकाणी फलक उभारून छगन भुजबळ यांना पालकमंत्री करून नाशिकला खड्ड्यातून बाहेर काढण्याची मागणी करण्यात आली.या बॅनरवर दत्तक नाशिकचे पालक मुख्यमंत्री फडणवीस साहेब भुजबळ साहेबांना पालकमंत्री करून नाशिकला खड्ड्यातून बाहेर काढा. सर्व सामान्य नाशिककरांच्या मनातील भावना असे या बॅनरवर लिहिण्यात आले आहे. राष्ट्रवादी काँग्रेसकडून हे बॅनर लावण्यात आले असून शहराध्यक्ष अंबादास खैरे यांनी हे बॅनर लावल्याची शहरात चर्चा आहे.
कार्यकर्त्यांनी लावलेले पालकमंत्री पदाचे बॅनर्स भुजबळांनी उतरवले भुजबळ म्हणाले की, नाशिकमध्ये खड्ड्यांमुळे चार-पाच निष्पाप लोकांचा मृत्यू झाल्याने नागरिकांमध्ये प्रचंड संताप आहे. रस्त्यांच्या बिकट समस्येवर भाष्य करणे म्हणजे ‘मलाच पालकमंत्री करा’ अशी मागणी करणे नव्हे. ज्या कार्यकर्त्यांनी माझ्या नावाचे फ्लेक्स लावले, त्यांच्यापर्यंत मी माझी नापसंती पोहोचवली असून सर्व बॅनर्स हटवण्याचे आदेश दिले आहेत. प्रशासनातील जबाबदार अधिकारी व कुंभमेळा प्राधिकरण प्रमुखांनी या गंभीर समस्येकडे तातडीने लक्ष देऊन पावसाळ्यात खड्डे बुजवावेत, जेणेकरून अपघात होणार नाहीत आणि वाहतूक कोंडी टळेल.
