नाशिकची जागा शिंदे गटाच्या शिवसेनेकडे नरेंद्र दराडे यांना उमेदवारी घोषित
नाशिक : नाशिक विधान परिषद निवडणुकीच्या पार्श्वभूमीवर राजकीय घडामोडींना वेग आलाय. महायुतीमधील नाशिकची जागा शिंदे गटाच्या शिवसेनेकडे गेली आहे. मात्र उमेदवारांची घोषणा होण्याआधीच भाजप नेते आणि नाशिक महानगरपालिकेचे माजी स्थायी समिती सभापती गणेश गीते यांनी आपला उमेदवारी अर्ज दाखल केलाय. विशेष म्हणजे, गणेश गीते यांनी भाजप पक्षाकडून आणि अपक्ष असे दोन स्वतंत्र उमेदवारी अर्ज दाखल केले आहेत. गणेश गीते हे मंत्री गिरीश महाजन यांचे निकटवर्तीय मानले जातात. अर्ज भरल्यानंतर प्रसारमाध्यमांशी बोलताना गीते यांनी थेट पक्षश्रेष्ठींचा हवाला दिला होता. ते म्हणाले होते की, “मला मुख्यमंत्री देवेंद्र फडणवीस प्रदेशाध्यक्ष रवींद्र चव्हाण आणि माझे नेते गिरीश महाजन यांनी या जागेसाठी शब्द दिला होता. पक्षाने दिलेल्या याच शब्दामुळे त्यामुळेच मी उमेदवारी अर्ज दाखल केला आहे.यामुळे गणेश गीते यांनी आपला अर्ज दाखल करून थेट महायुती पुढे आव्हान उभे केले. गणेश गीते यांनी भरलेल्या उमेदवारी अर्जावर भाजपच्या स्थानिक नगरसेवकांनी सूचक अनुमोदक म्हणून स्वाक्षऱ्या केल्या आहेत. भाजपच्या प्रदेश नेतृत्वाने याची गंभीर दखल घेतल्याची सूत्रांची माहिती आहे.प्रदेश स्तरावरून थेट नाशिकच्या स्थानिक पदाधिकाऱ्यांकडे याबाबत विचारणा करण्यात आली आहे. “नेमक्या कोणाच्या आदेशानुसार या सूचक आणि अनुमोदक स्वाक्षऱ्या करण्यात आल्या?” असा सवाल प्रदेश पातळीवरून विचारण्यात आल्याची माहिती समोर येत आहे. गणेश गीते यांच्या उमेदवारी अर्जावर स्थानिक नगरसेवकांनी केलेल्या स्वाक्षऱ्या हा भाजपचा अंतर्गत डावपेच किंवा राजकीय खेळी आहे, की स्थानिक नगरसेवकांचा केवळ अतिउत्साह, याबाबत सध्या राजकीय वर्तुळात चर्चा सुरू आहे. यादरम्यान गीते काय भूमिका घेतात याकडे लक्ष लागून आहे.
