नगरसेवक, पदाधिकाऱ्यांचे शक्तिप्रदर्शन, मतदारसंघात कामे मग नाव का टाळलं ?
नाशिक : भाजपने रविवारी 99 उमेदवारांची पहिली यादी जाहीर केली. यात नाशिक मध्यच्या आमदार देवयानी फरांदे यांचे नाव नसल्याने मध्य नाशिक मधील माजी नगरसेवकांनी, समर्थकांनी आणि पदाधिकाऱ्यांनी “सागर” बंगला गाठत आमदार देवयानी फरांदे यांच्या उमेदवारी साठी उपमुख्यमंत्री देवेन्द्र फडणवीस यांना साकडे घातले. नाशिक शहरात भाजपचे तीन आमदार असून भाजपने जाहीर केलेल्या पहिल्या यादीत नाशिक पूर्व साठी राहुल ढिकले व नाशिक पश्चिम साठी सीमा हिरे या विद्यमान आमदारांना उमेदवारी जाहीर करण्यात आली. मात्र सलग दोनदा आमदार राहिलेल्या देवयानी फरांदे यांचे नाव यादीत न आल्याने त्यांच्या समर्थकांना मोठा धक्का बसला यादरम्यान माजी महापौर सतीश कुलकर्णी, दीपाली कुलकर्णी, ऍड शाम बडोदे स्वाती भामरे, अनिल भालेराव यांच्यासह 21 नगरसेवकांनी उपमुख्यमंत्री फडणवीस यांची भेट घेत मुळात देवयानी फरांदे यांनी मतदारसंघात कामे केली असताना त्यांचे नाव का टाळण्यात आले असा प्रश्नच विचारण्यात आल्याचे समजते.त्याचबरोबर आता कमी दिवस असताना व उमेदवारी अर्ज दाखल करण्यास सुरुवात झाली असताना आता पर्यायी विचार करणे अशक्य असल्याची देखील शंका यावेळी उपस्थित करण्यात आली. यादरम्यान आमदार देवयानी फरांदे देखील उपस्थित होत्या त्यावर फडणवीस यांनी नक्कीच विचार केला जाईल असेही आश्वासन दिल्याचे समजते.
